Доналд Трамп денес мора да плати 454 милиони долари за пресудата за измама, или би можел да остане без некои од неговите имоти.
Трамп, претпоставениот републикански кандидат на претседателските избори во ноември, мора или да ги плати парите од свој џеб или да обезбеди друга гаранција со еднаква вредност додека се жали на судската пресуда од 16 февруари според која поранешниот претседател манипулирал со информациите за неговото богатство и големината на неговата компанија со цел да ги измами доверителите и осигурителните компании.
Тој денеска на социјалните мрежи повтори дека не е виновен и го нападна судијата кој досудил толкава сума. Неговата кампања во петокот повика на донации од „милион про-Трамп патриоти“, предупредувајќи дека и познатата кула Трамп е во опасност од конфискување.
Трамп на социјалните мрежи објави дека има кеш во износ од 500 милиони долари, но сака да ги потроши за изборна кампања.