Судирите во источна Украина го загрозуваат снабдувањето со вода на околу четири милиони луѓе во реонот на Доњецк, соопшти денеска Набљудувачката мисија на Организацијата за безбедност и соработка во Европа (ОБСЕ).
Според ОБСЕ, при судирите меѓу владините сили и проруските сепаратисти во тој дел на Украина, била оштетена пумпната станица во близина на градот Семјоновка, преку која минува системот за снабдување со вода на жителите во реонот на Доњецк.
Доњецкиот градоначалник Олександар Лукјанченко изјави дека преку оваа пумпна станица минува водата со која се снабдуваат еден милион жители на Доњецк и околу три милиони лица во населените места во околината на овој град.
ОБСЕ проценува дека оштетувањата на пумпата можат да бидат отстранети со што би се гарантирало нормално снабдување со вода, но дека во моментот тоа е невозможно поради судирите во тој реон.
Според ОБСЕ, оваа закана претставува уште еден доказ за зголемувањето на хуманитарната криза во источна Украина. Покрај со недостиг на вода, илјадници луѓе од тој дел на земјата се сочуваат и со недостиг на храна и струја, поради што се поголем број локални жители ги напуштаат своите домови и бегаат во Русија.