Вооружени напаѓачи убија 11 работници на државна фабрика во сиријската провинција Хомс и ова е втор случај во една недела што личи на масовно погубување.
Работниците се убиени во градот Казир, кога е нападнат автобусот што ги возел на работа, соопшти Сиријската опсерваторија за човекови права, со седиште во Велика Британија.
Во последните месеци ситуацијата во Сирија станува се похаотична и се потешко е да се утврди кој е одговорен за злосторствата. Владата им го ограничи движењето на новинарите и скоро е невозможно да се провери извештајот и од двете страни.
Минатиот петок беа убиени 108 лица. Масакрот предизвика остри реакции од целиот свет, а режимот и опозицијата се обвинуваа меѓусебно.