Шефот на Телеграм, Павел Дуров, ќе остане во притвор до 48 часа во рамки на истрагата за сајбер криминал, соопшти обвинителството во Париз, откако синоќа беше донесена одлуката за продолжување на притворот.
Дуров беше уапсен во саботата. Истрагата се однесува на кривични дела поврзани со сомнителни недозволени трансакции, детска порнографија и измама со апликации, како и одбивање да се дадат информации на властите.
Лидерот на руската Дума, Вјачеслав Володин, сојузник на претседателот Владимир Путин, во вторникот тврдеше дека САД стојат зад апсењето на Дуров, основачот и извршен директор на платформата за пораки Телеграм, која игра клучна улога во комуникацијата на војната во Украина.
Володин рече, без да обезбеди докази, дека САД се обиделе да ја контролираат Телеграм преку Франција.
„Телеграм е една од ретките и во исто време најголемите интернет платформи на кои САД немаат влијание“, рече Володин.
„Пред претседателските избори во САД, важно е (претседателот Џо) Бајден да ја преземе контролата над Телеграм.
Белата куќа не го коментираше апсењето на Дуров, а францускиот претседател Емануел Макрон рече дека апсењето „во никој случај не е политичка одлука“.
Шифрираната апликација Telegram, со седиште во Дубаи, има близу милијарда корисници и е особено влијателна во Русија, Украина и републиките од поранешниот Советски Сојуз.
Откако Русија ја почна инвазијата на Украина во 2022 година, Телеграм стана извор за нефилтрирани – а понекогаш и експлицитни и погрешни – содржини од двете страни за војната.
Платформата стана она што некои аналитичари го нарекуваат „виртуелно бојно поле“ во војната, што интензивно го користат украинскиот претседател Володимир Зеленски и неговите претставници, како и руската влада, пишува Ројтерс.