Две лица загинаа денес при уривање на лесниот авион „Цесна 172“ во Република Татарстан, Русија, соопшти руското Министерство за вонредни ситуации.
Несреќата се случила во селото Шемордан во областа Сабина, каде што авионот падна во дворот на приватна куќа.
Според првичните информации, нема повредени лица на земјата, ниту пак се оштетени објекти.
Во авионот се наоѓаа две лица и двете загинаа.
Руските медиуми наведуваат дека жртвите се пилот-инструктор и кадет од воздухопловниот центар, односно дека авионот бил на лет за обука.
Руските власти покренаа истрага за да се утврди причината за падот на „Цесната“.
Според досегашните информации, истражителите разгледуваат две главни можности: пилотска грешка и технички дефект на авионот. Покрената е и кривична постапка поради сомневање за прекршување на правилата за безбедност во воздушниот сообраќај.
Некои руски медиуми и канали на „Телеграм“ наведуваат дека авионот можеби удри во телевизиска кула непосредно пред падот, но оваа информација сè уште не е официјално потврдена.
Руското Министерство за вонредни ситуации соопшти дека околностите и точната причина за несреќата сè уште се утврдуваат.