Шпанскиот премиер Педро Санчез објави дека земјата ќе ѝ предложи на ЕУ да го раскине договорот за асоцијација со Израел поради прекршување на меѓународното право.
Зборувајќи на митинг во Андалузија, Санчез рече дека влада што го крши меѓународното право или принципите на Европската Унија не може да биде нејзин партнер, со што дополнително ја заострува реториката кон израелската влада.
Во последните месеци, шпанскиот премиер се смета за еден од најгласните критичари на Израел во рамките на ЕУ. Тој го обвини израелскиот премиер Бенјамин Нетанјаху за сериозни злосторства во Газа и ги нарече заедничките напади на САД и Израел врз Иран „колосална грешка“.
Критиките доаѓаат и поради израелските воени активности во регионот, вклучително и нападите врз Либан, за кои некои европски претставници веруваат дека ги загрозуваат шансите за поширок мировен договор. Санчез повика на итен прекин на конфликтот на Блискиот Исток, предупредувајќи на зголемување на цените на нафтата и масовно раселување на населението.
Дополнителен притисок врз Израел доаѓа преку иницијативата на министрите за надворешни работи на Шпанија, Ирска и Словенија, кои во писмо до високата претставничка на ЕУ за надворешна политика, Каја Калас, наведоа дека Израел ги крши одредбите од договорот со ЕУ. Како причини, тие ги истакнаа одлуките на израелскиот парламент за смртната казна, како и насилството врз израелските доселеници на Западниот Брег.
Сепак, предлогот на Мадрид се соочува со сериозни пречки. Раскинувањето на договорот бара едногласна поддршка од сите 27 членки на ЕУ, што во моментов изгледа малку веројатно. Групата земји предводена од Германија претходно се спротивстави на построгите мерки против Израел.
Да ве потсетиме дека слична иницијатива на Европската комисија од септември минатата година, која вклучуваше санкции против одредени израелски министри и суспендирање на делови од трговскиот договор, не го доби потребното мнозинство.
Израелската мисија во ЕУ сè уште не го коментираше најновиот предлог од Мадрид, според Политико.