Референдумот за независност на Доњецката република закажан за претстојниот викенд, ги чини организаторите само 1.200 евра, покажуваат податоците на локалните власти.
На тонер за три позајмени печатари на кои се отпечатени гласачките ливчиња за три милиони гласачи, организаторите потрошиле само 500 евра, односно 8.000 украински гривни.
Списокот на гласачи е стар две години, а резултатите ќе бидат важечки без оглед на излезноста.
Покрај тоа на гласањето не е повикан ниту еден странски набљудувач.
Прашањето на гласачките лилвчиња е:
– Дали поддржувате самоопределување на Народната република Доњецк?
Освен мал знак на сите четири агли на гласачкото ливче на црно-белата хартија нема никакви други специјални ознаки кои би требало да спречат фалсификат.
Гласачките места ќе бидат отворени од 8 до 22 часот во недела на 11 мај по што на 53 локации ширум Доњецката и Луганската област каде се организира референдум ќе биде организирано пребројување.
Кутиите потоа ќе бидат транспортирани во регионалните главни градови при што ќе мора да минат низ контролни пунктови – како на проруски така и на украинските власти. Проруските лидери кои го организираат референдумот во Доњецк не откриваат многу како ќе изгледа таа идна република, кои овластувања ќе ги има и дали ќе бара присоединување со Русија како што во средината на март тоа го сторија Крим.