Поранешен лидер на Ерменците во Нагорно-Карабах изјави дека речиси 100 луѓе се убиени, а стотици се повредени денеска откако Азербејџан започна операција против ерменските сепаратистички власти.
„Ова е голема војна. Азербејџан започна целосна операција“, изјави Рубен Вардањан, поранешен водач на отцепениот регион, за Ројтерс од Нагорно-Карабах.
Тој посочи дека азербејџанските сили ја продолжиле воената операција во текот на ноќта и во средата.
„Стотици луѓе се веќе повредени, а близу 100 луѓе се убиени. Тие всушност ни велат дека треба да заминеме и да не останеме овде, или да прифатиме дека ова е дел од Азербејџан. Ова е во основа типична операција за етничко чистење и војна во која сега умираат многу цивили“, додаде тој.
Баку ги отфрла обвинувањата дека негова цел е етничко чистење на Нагорно-Карабах и вели дека ќе ги заштити правата на ерменските цивили во таа област во согласност со својот устав. Сепак, тој вели дека е решен да ја отстрани политичката и воената структура на отцепениот регион.