Украинскиот претседател Петро Порошенко вчера го потпиша декретот за распуштање на Парламентот, со што го отвори патот за одржување предвремени избори кои, како што најави, ќе се спроведат на 26 октомври.
– Одлучив предвремено да го распуштам Парламентот, објави Порошенко на Твитер.
Тој нагласи дека одлуката за распуштање на Врвохвната рада е во согласност со украинскиот Устав и потсети дека владејачката коалиција се распаднала пред неколку недели.
– Многу членови на Парламентот се сојузници на сепаратистите, наведе Порошенко, мислејќи на проруските сили кои од април се борат против владините на истокот на земјата, пренесува Танјуг.
Најголема партија во Парламентот е Партијата на регионите, која има поддршка на истокот на Украина и која ја поддржуваше поранешниот претседател Виктор Јанукович.
Порошенко рече дека могумина во Парламентот се „столбови на поддршка“ за Јанукович и ги обвини дека изгласале „диктаторски закони“ за време на неговото владеење.
Порошенко ги повика демократските политички сили да се кандидираат на изборите како единствен проукраински и проевропски тим, потенцирајќи дека 80 отсто од народот поддржува предвремени избори.
Распуштањето на Парламентот и изборите се последица на распаѓањето на владејачката коалиција на 24 јули. Еден месец подоцна не е оформена нова коалиција од најмалку 226 пратеници.