Алжирската полиција се обидува да смири повеќе од илјада демонстранти, кои излегле низ улиците на главниот град во знак на протест поради објавените карикатури на пророкот Мухамед од францускиот сатиричен неделник „Шарли ебдо“.
Демонстрантите, кои скандирале „Јас не сум Шарли, јас сум Мухамед“, излегоа од џамиите по петочната молитва и се собраа на главниот плоштад „Први мај“, каде беа пресретнати од стотици полицајци.
Протестите во Алжир се забранети, но досега се уапсени само неколку лица.
Истовремено, стотици палестински муслимани денеска, исто така, протестираа по петочната молитва поради објавувањето на новите карикатури на пророкот Мухамед.
Собирот се одржа на Плоштадот на џамиите во Источен Ерусалим.
Демонстрантите носеле транспаренти на кои пишувало „Исламот е религија на мирот“ и „Пророкот Мухамед секогаш ќе биде наш водач“.
Претходно, властите во Сингапур соопштија дека нема да дозволат во локалните медиуми да се појават копии од карикатурите на пророкот Мухамед, кои беа објавени оваа недела во весникот „Шарли ебдо“.
Во Ингушетија за утре е закажан протест под името „Исламот против тероризмот и екстремизмот“, на кој се очекува да присуствуваат околу 3.000 луѓе.