Бразилскиот претседател Луиз Инасио Лула да Силва остро одговори на најновите закани на американскиот претседател Доналд Трамп за воведување царини од 50 проценти на бразилските стоки, велејќи дека Трамп „беше избран да ги води Соединетите Американски Држави, а не да биде император на светот“.
Минатата недела, Трамп ги објави царините, кои треба да стапат на сила на 1 август, и ја поврза својата одлука со она што тој го нарекува „политички прогон“ против поранешниот бразилски претседател Жаир Болсонаро, близок сојузник на Трамп.
Болсонаро моментално се соочува со судење за обид за државен удар откако Лула да Силва победи на претседателските избори во 2022 година.
Доколку биде осуден, може да се соочи со повеќе од 40 години затвор.
Во интервју за Кристијан Аманпур од „Си-Ен-Ен“, Лула да Силва рече дека заканите на Трамп се „надвор од дипломатскиот протокол“ и дека судбината на поранешниот претседател Болсонаро „не може да биде предмет на трговски преговори“.
„Судството во Бразил е независно. Претседателот на Републиката нема влијание“, рече Лула да Силва.
„Болсонаро не е на суд затоа што е мој противник, туку поради обидот за организирање државен удар“ рече тој.
Лула призна дека на почетокот мислел дека објавата на Трамп не е вистинска.
„Беше многу срамно. Мислев дека се лажни вести“, рече тој.
Владата на Бразил најави одмазднички тарифи ако Трамп продолжи, станувајќи првата земја што отворено ја отфрли економската закана на Трамп откако тој повторно ја презеде функцијата.
„Бразил нема да прифати никакви наметнати услови. Ние сме подготвени за преговори, но не и за ултиматуми“, рече Лула да Силва.