Еуростар, меѓународниот оператор на брзи возови што го поврзува Лондон со Париз, Брисел и Амстердам, им советуваше на патниците да ги одложат своите патувања денеска.
Причината е „сериозен проблем“ со снабдувањето со електрична енергија во тунелот под Ла Манш, подводен железнички тунел долг 50 километри што ги поврзува Обединетото Кралство и Франција.
Во соопштение објавено на официјалната веб-страница, Евростар соопшти дека имало дефект со надземниот далновод во тунелот, што исто така предизвикало откажување на еден воз Le Shuttle – специјална железничка услуга управувана од Getlink, која, за разлика од Евростар, се користи исклучиво за транспорт на автомобили, камиони и автобуси низ тунелот.
На патниците им се советува да не доаѓаат на станиците и да ги презакажуваат своите патувања.
Операторот предупредува дека возовите што сообраќаат доцнат со часови и дека се можни дополнителни откажувања во последен момент. Слично предупредување издаде и Британската национална железница.
Тие им кажаа на патниците на линијата Лондон Сент Панкрас (главниот терминал за меѓународни возови во Лондон) – Париз Гар ди Норд (една од најпрометните железнички станици во Европа) да не патуваат поради очекуваните големи прекини.
Голем број откажани поаѓања веќе се означени на веб-страницата на Евростар. Од Лондон до Париз, меѓу другите, возовите во 14:31, 15:31 и 20:01 часот беа откажани, додека поаѓањата во спротивна насока беа откажани во 15:12, 17:12, 20:12 и 21:12 часот. Евростар вели дека списокот на откажани возови би можел дополнително да расте.
Од меѓународната станица Сент Панкрас во Лондон пристигнуваат информации за големи толпи, каде што многу патници се собираат во зоната за заминување, и покрај предупредувањата да не доаѓаат на станицата. „Еуростар“ продолжува да апелира до патниците да ги одложат своите патувања додека не се отстрани електричниот дефект во тунелот.