Украинскиот претседател Петро Порошенко изјави во Канада дека Украина премина кон нова, насочена иднина кон Запад, што зад себе го остава руското минато.
Порошенко ова го изјави во обраќање пред пратениците на канадскиот Парламент.
– Како главен командант на армијата, Украинец и татко на војник, се заблагодарувам на Канада за секој спасен живот во Донбас благодарение на панцирите или шлемовите што ни ги дадовте, изјави Порошенко.
Канадскиот премиер Стивен Харпер по состанокот со Порошенко изјави дека канадската Влада ќе обезбеди финансиска и хуманитарна помош за Украина.
Меѓу другото, договорен е кредит за Украина во период од пет години и висина од 200 милиони долари.
Порошенко денеска ќе замине во Вашингтон каде ќе се сретне со американскиот претседател Барак Обама, потпретседателот Џозеф Бајден и државниот секретар Џон Кери.