Поранешниот член на Претставничкиот дом на САД, Џорџ Сантос, е осуден на седум години и три месеци затвор за повеќе кривични дела, вклучувајќи онлајн измама и кражба на идентитет.
Сантос со солзи го слушаше изрекувањето на пресудата, изразувајќи каење и молејќи за милост.
Во судницата во Централниот округ на Њујорк, недалеку од неговата поранешна изборна единица, тој рече дека е „понижен“ и дека „ја издал довербата на своите избирачи“.
„Длабоко се извинувам. Не можам да го сменам минатото, но можам да влијаам на мојата иднина“, рече 36-годишниот Сантос.
Судијката Џоана Сејберт не беше убедена во неговата искреност.
„Каде ти е каењето? Каде можам да го видам?“ праша таа, забележувајќи дека Сантос честопати се обидувал да ја префрли вината на други. Покрај затворската казна, му беше наредено да плати околу 580.000 долари казни и отштета.
Сантос отслужи помалку од една година во Конгресот пред да биде разрешен од неговите колеги – што се случило само шест пати во историјата. За време на процесот, тој призна дека ги измамил донаторите и ги користел идентитетите на најмалку десет лица, вклучувајќи членови на неговото семејство, за финансирање на неговата изборна кампања.
Федералниот обвинител Џон Дарам по судењето изјави дека Сантос „ја користел политичката сцена за лично збогатување“ уште од самиот почеток на својата кампања.
Обвинителите изјавија дека меѓу жртвите имало луѓе со сериозни здравствени проблеми, вклучувајќи жена со оштетување на мозокот и две постари лица со деменција. Иако во тоа време добивал нелегални надоместоци за невработеност, Сантос дури бил и косопственик на закон во Конгресот за борба против ваквите злоупотреби.
Одбраната побара минимална казна од две години, тврдејќи дека Сантос е формиран преку трауматско детство, злоупотреба и сиромаштија, и дека тој „конструирал верзија од себе за која мислел дека општеството ќе ја прифати“.
По изборите во 2022 година, Сантос стана познат по тоа што лажеше за многу аспекти од својот живот – од неговата бизнис кариера на Волстрит до неговата семејна историја и религиозна припадност. Тој тврдел дека потекнува од еврејско семејство кое го преживеало Холокаустот, иако новинарите откриле дека неговото семејство било католичко. Тој исто така тврдеше дека е геј, иако претходно бил во брак со жена.
Пред изрекувањето на пресудата, Сантос се огласи на социјалните мрежи за да им се заблагодари и на поддржувачите и на критичарите, велејќи дека тие „го научиле на сочувство“ и „му ја зацврстиле кожата“. Сепак, дури ни тогаш не се откажа од самопромоцијата – ги покани следбениците да резервираат персонализирани видео пораки преку платформата Cameo, каде што нудеше снимки за 100 долари.
Сантос треба да се јави во затвор на 25 јули. По судењето, тој не даде изјави за новинарите.