САД планира да премести нуклеарни боеви глави во Велика Британија како одговор на растечката закана од Русија, објави денеска британски Телеграф. Високи воени и цивилни претставници од двете страни на Атлантикот повикаа на зголемени подготовки во случај на можна војна меѓу силите на НАТО и Русија.
Документите на Пентагон, според Телеграф, покажуваат дека нуклеарното оружје ќе биде лоцирано во базата Лејкенхит на британските воздухопловни сили во Сафолк. Весникот наведува дека се работи за оружје кое е околу три пати посилно од бомбата фрлена врз Хирошима.
Новинарите, исто така, побараа коментар до Министерството за одбрана на Обединетото Кралство, чиј портпарол рече: „Долгогодишната политика на Велика Британија и НАТО е ниту да го потврдуваат ниту негира присуството на нуклеарно оружје на одредена локација“.
Американските нуклеарни бомби последен пат беа стационирани во Британија во 2008 година, кога беа отстранети бидејќи заканата од Студената војна од конфликт со Русија се намали. Според Телеграф, се верува дека нуклеарните бомби од типот Б61-12, кои можат да се испукаат од борбени авиони, би можеле да бидат испратени во базата на британските воздухопловни сили.
Телеграф наведува дека преместувањето на нуклеарните бомби произлегува од програмата на НАТО за развој и надградба на нуклеарни локации, што беше поттикнато од руската инвазија на Украина. Претходно оваа недела, генералот Патрик Сандерс, командантот на британската армија во заминување, рече дека нејзините редови од 74.000 војници треба да се зајакнат со најмалку 45.000 резервисти и цивили.
Генералот Ричард Шериф, поранешен заменик врховен командант на сојузничките сили на НАТО, изјави за Скај њуз дека одбранбениот буџет на Велика Британија не е доволно голем за адекватно зајакнување на вооружените сили на. Тој додаде дека е време да се „размисли незамисливото“ и да се размисли за воведување воен рок за да се подготви земјата за потенцијална копнена војна.
„Мислам дека треба да направиме чекор понатаму и внимателно да размислиме за воведување задолжителна воена служба“, рече тој. Но, британската влада ги отфрли таквите идеи, велејќи дека воената служба ќе остане доброволна.