Полицијата во Одеса денеска почна да ослободува проруски активисти, уапсени во судирите пред два дена, соопшти прес службата на градската управа на МВР, пренесува ИТАР-ТАСС.
Претходно над 2.000 проруски активисти упаднаа во градската управа на полицијата во Одеса. Демонстрантите ја пробиле главната капија со два камиони и влегле во дворот на управата.
Тие барале да бидат ослободени уапсените на 2 мај приврзаници на федерализацијата, што биле уапсени додека бегале од опожарената синдикална зграда во градот.
Демонстрантите бараа и оставка на гувернерот на областа Владимир Немировкси, нарекувајќи го „убиец“ и обвинувајќи го за пожарот и судирите во центарот на Одеса.