Мексиканската полиција бара 23 затвореници кои избегаа од затвор во Пуерто Ваљарта за време на бранот насилство што го започна картелот „Нова генерација Халиско“ (CJNG) завчера.
Насилството избувна како одмазда за убиството на нивниот водач, Немесио Осегуера Сервантес познат како „Ел Менчо“, кој беше убиен од безбедносните сили.
Пуерто Ваљарта, одморалиште на брегот на Пацификот, беше меѓу градовите каде што CJNG блокираше патишта и запали автомобили, пишува Би-Би-Си.
За време на немирите, вооружени мажи влегоа со автомобил низ вратите на затворот, дозволувајќи им на затворениците да избегаат, изјави официјален претставник. Во операцијата за апсење на Ел Менчо и насилството што следеше загинаа повеќе од 70 лица, вклучувајќи 25 членови на Националната гарда.
Хуан Пабло Ернандез, секретар за безбедност на државата Халиско, рече дека неговата канцеларија работи со други држави за апсење на бегалците. Властите сè уште не објавија детали за идентитетот на избеганите затвореници.
Членовите на картелот завчера запалија неколку возила низ Пуерто Ваљарта. Туристите и локалното население беа повикани да побараат засолниште и да останат во затворен простор, а снимките покажаа облаци од црн чад што се издигаа над популарното одморалиште.
Голем број авиокомпании привремено ги прекинаа летовите, а најмалку две големи крстосувачки компании објавија дека ќе ги прескокнат закажаните пристаништни застанувања.
Мексиканската влада вчера објави дека повеќето од блокадите на патот поставени од членовите на картелот се отстранети. Но, весникот „Ел Универзал“ објавува дека во државата Морелија, родното место на нарко-босот Ел Менчо, вооружени мажи продолжиле да шират страв вчера, палејќи автомобили и уништувајќи продавници и јавни згради.
Ел Менчо беше најбараниот човек во Мексико. Под негово водство, CJNG стана моќна транснационална криминална организација која се прошири од своето упориште во државата Халиско до многу други мексикански држави, каде што се занимава со производство и трговија со дрога.