Петмината Индијци обвинети за групното силување и убиството на 23-годишната студентка во Њу Делхи во декември минатата година, денеска пред Судот се изјаснија за невини по сите точки од обвинението.
Обвинетите, кои во Судот беа донесени со прекриени лица, се обвинети по 13 точки, меѓу кои и за убиство, за што може да бидат осудени на смрт.
Според адвокатите, денешното рочиште траело само 15 минути, за кое време било прочитано обвинението и обвинетите се изјазниле за невини. Следното продолжение на судењето е закажано за 5 февруари.
Случајот на студентката, која на 16 декември била силувана во автобус во движење и претепана со метални шипки, по што почина по две недели, предизвика масовни протести низ улиците во повеќе индиски градови и поттикна јавна расправа за насилството врз жените во Индија.
Судењето на осомничените се спроведува во специјаклен „брз“ Суд, формиран по злосторството врз девојката. Целиот процес е затворен за јавноста.
За убиството на студентката е обвинет и еден 17-годишник, но тој не е вклучен во групата од петмината осомничени, туку ќе му се суди во одвоен процес бидејќи е малолетен. Максималната казна што тој може да ја добие е доживотен затвор.