Унгарскиот премиер Виктор Орбан денес изјави дека граѓаните ги поддржуваат унгарските власти по сите клучни цивилизациски прашања, велејќи дека Унгарците не сакаат миграција и војна, ниту испраќање пари во Украина.
Зборувајќи на годишната проценка на состојбата на нацијата во комплексот Варкерт Базар во Будимпешта, Орбан рече дека владата е поддржана од „огромни маси луѓе кои живеат од работа“, како и од пензионери и голем број млади луѓе, пренесува МТИ.
За младите, тој изјави дека тие го отфрлаат „лажниот бунт“ и дека се подготвени да се спротивстават на, како што рече, „бесмислените инструкции од Брисел, меѓународните мрежи и големиот капитал“.
Унгарскиот премиер рече дека 2026 година ќе биде „година на победа за семејствата, десницата, Фидес и Унгарија“, нагласувајќи дека зачувувањето на независноста и суверенитетот на земјата е главна задача на владата.
Тој нагласи дека Унгарија е најбезбедната европска земја и оцени дека коалицијата Фидес-КДНП е безбеден избор пред изборите.
Орбан ја обвини опозицијата дека дејствува по налог на „бриселските господари“, наведувајќи дека Демократската коалиција „ја продала својата душа“ одамна, додека партијата Тиса ја опиша како „директна креација на Брисел“.