Нема мнозинство во блокот на израелскиот премиер Бенјамин Нетанјаху „Ликуд“ за поддршка на планот за создавање палестинска држава, изјави денеска пратеничка од партијата, јави ДПА.
Пратеничката Мири Регев, изјавата ја направи откако американскиот државен секретар Џон Кери во Вашингтон објави дека Израел и Палестинците ќе се обидат да постигнат конечен мировен договор во рок од девет месеци, а официјалните преговори ќе започнат по период од две недели.
Според Регев во моментот нема мнозинство за решение преку моделот на две држави за два народа. Регев е пратеник од партијата на Нетанјаху „Ликуд“ и тврдо се противи на чекорите за мир со Палестинците, наведува ДПА.
– Претходно применивме 10-месечно замрзнување на изградбата на населби и ништо не се доби. Ариел Шарон го одржа повлекувањето од Појасот Газа и добивме тероризам. Денеска пуштаме затвореници, чии раце се извалкани во крв, нагласи Регев.
Пратеничката го обвини Нетанјаху дека дејствувал против волјата на мнозинството во сопствената партија, кога го одобрил ослободувањето на 104 палестински затвореници во чест на добра волја со што се отвори патот за рестартирање на мировните преговори, по прекин од три години.