Најмалку седум лица загинаа во поплавите, кои го парализираат веќе втор ден филипинскиот главен град Манила, соопштија локалните власти.
Меѓу жртвите е едно 5-годишно момче, врз чија куќа се урнал бетонски ѕид. Четири лица се исчезнати, а 11 се повредени.
Околу 130 илјади лица се евакуирани. Тие се сместени во над 200 засолништа отворени во Манила и околните провинции.
Досега од поплавите се погодени над 600 илјади луѓе.
Поројни монсунски дождови го зафатија филипинскиот главен град во текот на викендот. Нивото на водата во Манила достигна 2 метри.
Филипините се една од земјите во светот кои се најчесто погодени од поројни дождови и поплави. Околу 20 тропски циклони минуваат низ архипелагот секоја година.