Најмалку 20 Палестинци загинаа, а десетици се повредени во израелски воздушни напади врз бегалскиот камп Џабалија во северниот дел на Појасот Газа, соопштија палестинските здравствени власти.
Жителите изјавија дека тенковски гранати паднале врз центарот на кампот и дека во воздушните напади биле уништени голем број куќи.
Според сведоштвата на жителите на Џабалија и медиумите под контрола на групата Хамас, израелски тенкови се обидуваат да се пробијат до центарот на бегалскиот камп.
Израелските одбранбени сили (ИДФ) ги интензивираа нападите врз бегалскиот камп Џабалија, додека продолжуваат со воздушните напади на истокот на градот Рафах. ИДФ го бомбардира и источниот дел на градот Рафах на југот на Појасот Газа, а неговите тенкови се наоѓаат во близина на патот Салахудин.
Хамас соопшти дека неговите членови се борат против ИДФ источно од Џабалија, каде Израел вели дека се обидува да го спречи Хамас да ги обнови своите борбени способности.