Бројот на жртвите во денешниот артилериски напад во украинскиот град Мариупољ достигна 20 лица, изјави началникот на обласната управа при Министерството за внатрешни работи во Доњецката област, Вјачеслав Аброскин.
Се очекува бројот на загинатите да се зголеми, а полицијата целосно го блокирала реонот на нападот и продолжува со истрагата.
Претходно Градскиот совет на Мариупољ соопшти дека се убиени 16 лица, а 83 се повредени.
– Украина побара од Советот за безбедност на ОН да свика итна седница поради ситуацијата во Мариупољ, изјави украинскиот премиер Арсениј Јацењук на денешната седница на оперативниот штаб.
Тој, исто така, свикал средба и на амбасадорите на земјите од Г-7, како и на државите-членки на СБ на ОН.
Двете страни во украинскиот конфликт меѓусебно се обвинуваат за крвавиот напад.
Украинското МВР ги обвини проруските сепаратисти дека нападнале станбен комплекс во градот, додека властите во самопрогласената „Доњецка Народна Република“ ги отфрлаат ваквите тврдења.