Претседателите на Египет и на Тунис, кои дојдоа на васт благодарение на бунтовите во нивните земји, изразија поддршка за сирискиот народ, но во исто време отфрлија странско воено вмешување против режимот на Башар ал Асад.
По синоќешната средба на египетскиот претседател Мухамед Морси со неговиот колега од Тунис Монсеф Марзуки во Каиро, тие истакнаа дека го поддржуваат сирискиот народ.
– Ние сме на страната на сирискиот народ, неговата борба и револуција. Ние сме против странско воено вмешување во Сирија, истакна Морси.
Марзуки посочи оти воена интервенција против режимот на Асад „само би ја влошило ситуацијата“.
Двајцата претседатели ги поддржаа и Палестинците и во исто време ги повикаа ривалските Фатах и Хамас на помирување.