Рускиот премиер Дмитриј Медведев верува дека планот на пратеникот на ОН и на Арапската лига Кофи Анан не е исцрпен и дека сириските власти и опозицијата треба да седнат зад преговарачка маса и да го окончаат судирот.
Во интервју за лондонски „Тајмс“, Медведев напомена и дека не е „неумерен оптимист“, бидејќи ситуацијата во Сирија е многу тешка.
Рускиот премиер смета дека за сегашната ситуација се одговорни двете страни.
„Незнам каква ќе биде точно конфигурацијата на политичките сили во Сирија. Не знам ниту кое е местото на сирискиот претседател Асад во таа конфигурација“, рече Медведев напоменувајќи дека одлуката за тоа треба да ја донесе сирискиот народ.
Според него, разликите во ставовите на Русија и Велика Британија и САД за решение на кризата во Сирија не се толку големи колку што изгледаат.
„Сите веруваме дека најлошото сценарио за Сирија би било сеопшта граѓанска војна а во моментот таму постои навестување за граѓанска војна“, рече Медведев.
Тој појасни дека разликата меѓу рускиот и британскиот став е тоа што Москва смета дека преговорите се единствен пат кон решение. – Нашите партнери повикуваат на одлучна акција. Во ваква ситуација се поставува прашањето – каде се завршуваат резолуциите а почнуваат воените операции. Сите тоа го видовме кога се носени резолуции за Либија. Се на крајот заврши со меѓународна интервенција. Тоа е лош пат кој никој не го сака, рече рускиот премиер.