Доколку американскиот претседател Доналд Трамп не побрза, жителите на Гренланд би можеле да гласаат за приклучување кон Русија, изјави иронично Дмитриј Медведев, заменик-претседател на Советот за безбедност на Руската Федерација.
– Трамп мора да побрза. Според непотврдени информации, за неколку дена може да се одржи ненадеен референдум, каде што сите 55.000 жители на Гренланд би можеле да гласаат за приклучување кон Русија. И тогаш е готово! Нема повеќе нови ѕвезди на знамето. И Русија би добила нов, деведесетти субјект на Федерацијата – напиша Медведев на социјалните мрежи.
Гренланд е дел од Кралството Данска.
Сепак, Трамп постојано изјавува дека островот треба да стане дел од САД, наведувајќи ја неговата стратешка важност за националната безбедност.
Американскиот претседател одби да вети дека нема да употреби воена сила за да воспостави контрола врз Гренланд, како и јасно да одговори на прашањето што му е поважно – самиот остров или зачувувањето на НАТО алијансата.
Властите на Данска и Гренланд ги предупредија САД да не се обидуваат да го преземат островот, нагласувајќи дека очекуваат почитување на нивниот територијален интегритет.
Во јануари, земјите од Европската Унија разгледаа можна реакција во случај заканите на САД во врска со Гренланд да станат реалност.
Гренланд беше данска колонија до 1953 година. Сè уште е дел од Кралството Данска, но во 2009 година доби автономија, вклучително и правото на самоуправа и независно донесување одлуки за внатрешната политика.