Малезискиот авион „Боинг 777“ соборен е кај Торез, во Украина, на 50 километри пред границата со Русија, токму над просторот каде што се водат борби на украинската војска и проруските сили. Украинската власт веднаш ја искористи несреќата за да ги обвини проруските сили дека го урнале авионот.
Советникот на украинскиот министер за внатрешни работи Антон Герашенко изјави дека авионот е соборен со ракета земја-воздух. Тој на својот фејбук профил напиша дека авионот е погоден со проектил од системот „бук“ кој го поседува руската армија уште од времето на СССР.
Реагираа веднаш проруските сили од областа Донјецк кои го отфрлија обвинувањето со образложение дека не поседуваат таков противвоздушен систем.
За авионот кој леташе на висина од 10.000 метри, проруските сили тврдат дека е урнат од страна на украинската војска.
-Авионот го соборија украинските сили. Ние немаме такво оружје. Нашите ракети имаат домет од 3000 до 4000 метри, а боингот лета на многу поголема висина, рече Сергеј Кавартаџе, претставник на самопрогласената Република Донјецк.
Во меѓувреме на социјалните мрежи се води вистинска битка со обвинувања кој е виновен за падот на авионот. Прво тврдењето дека авионот е соборен дојде од Русија, а несреќата беше причина веднаш да се слушнат рускиот и американскиот претседател Владимир Путин и Барак Обама.