Повеќе од 20.000 ранети остануваат во Појасот Газа, соопштија „Лекари без граници“ (MSF), и покрај првите евакуации на палестински пациенти, странци и двојни државјани во Египет.
„Повеќе од 20.000 ранети остануваат во Газа, каде што нивниот пристап до здравствена заштита е ограничен поради блокадата и континуираното бомбардирање од страна на израелската армија“, се вели во соопштението на хуманитарната организација.
„Лекари без граници“ додаваат дека 22 од нивните меѓународни вработени ја напуштиле Газа преку граничниот премин Рафах, побарале евакуација на повеќе луѓе од палестинската територија.
„На оние кои сакаат да ја напуштат Газа мора да им се дозволи да го сторат тоа без да чекаат и без да им се ускрати правото подоцна да се вратат во Газа“, велат „Лекари без граници“, кои повикуваат на „итен прекин на огнот“.
Според египетски функционер, 76 ранети Палестинци и 335 странци и двојни државјани ја напуштиле Газа во средата, во првата операција за евакуација од почетокот на Хамас-израелската војна на 7 октомври.
ОН и невладините предупредуваат на катастрофалната хуманитарна состојба на малата палестинска територија со 2,4 милиони жители.