Министерот за надворешни работи на Русија, Сергеј Лавров денеска изјави дека американските власти во суштина, преку своите изјави признале дека експлозиите на гасоводот „Северен тек“ биле дело на САД и дека за тоа зборуваат со задоволство.
„Американските власти во суштина признаваат дека експлозиите што ги потресоа Северен тек 1 и 2 беа нивно дело. Тие дури се согласуваат кога зборуваат за тоа“, рече Лавров, пренесува ТАСС.
Според него, Америка проценила дека Русија и Германија соработувале „премногу добро“ во последните 20-30 години, воспоставувајќи моќен сојуз заснован на руски ресурси и германска технологија.
„Тоа стана закана за монополската позиција на голем број американски корпорации. Затоа беше потребно некако да се уништи и да се направи намерно“, додаде рускиот министер.
Лавров рече дека постои аспект поврзан со тоа што пријателството меѓу Москва и Берлин, националното помирување што се случи меѓу Русите и Германците, на некои им станало трн во око.
ТАСС пишува дека американскиот помошник државен секретар Викторија Нулад на 27 јануари изјави дека САД се задоволни што „Северен тек 2“ нема да профункционира.
На 27 септември компанијата Северен тек објави дека се оштетени три гасоводи на Северен тек 1 и 2.