Украинските Вооружени сили по дводневни улични борби презедоа контрола врз поголемиот дел од градот Луганск, соопшти денеска Советот за национална безбедност на Украина.
– Нашите сили сега контролираат значителен дел од градот, изјави портпарилот на Советот, Андреј Лисенко.
Украинските медиуми претходно денеска јавија дека во Луганск влегле „колона руски воени возила без ознаки и 1.200 војници во зелени униформи“, без да дадат повеќе детали.
Сепаратистичките локални власти во Луганск прогласија „состојба на хуманитрана катастрофа“, бидејќи градот веќе 18 дена нема вода и струја, а во прекин се и телефонските врски.
Русија минатата недела кон Луганск и соседниот град Доњецк, упати конвој возила за кои тврдеше дека се натоварени со хуманитарна помош, но властите во Киев не дозволија нивно влегување на украинска територија.