Индија прогласи највисок степен на тревога пред денешниот налет на силен циклон на источниот брег на земјата и од тоа подрачје евакуираше повеќе стотина илјади луѓе.
Циклонот „Фаилин“ се приближува со брзина од дури 240 километри на час и има потенцијал да биде најголемата бура во тоа подрачје во последните 14 години, која ќе го крене нивото на морето за три метри.
Силниот ветер и обилните дождови веќе ги погодија индиските сојузни држави Ориса и Андра Прадеш, каде дрвјата под налетите на ветрот се кршат неколку часови пред „Фаилин“ со својата сила да удри на копното.
Циклонот најверојатно ќе го погоди сиромашното крајбрежно подрачје, кое тешко беше погодено во 1999 година, кога загинаа повеќе од 8.000 лица и настрадаа 445.000 грла стока.