Израелската армија досега убила осум илјади борци на Хамас за време на војната во Газа, објави армискиот портпарол, додека премиерот Бенјамин Нетанјаху ја најави борбата на Израел до „тотална победа“ над Хамас. Споменатата проценка се заснова на извештаи за целни напади и извештаи од бојното поле, како и сослушување на затвореници, изјави портпаролот на израелската армија.
Израелските сили се движат подлабоко во Појасот Газа, изјави премиерот Бенјамин Нетанјаху во денешниот говор, додавајќи дека Израел ќе постигне „тотална победа“ над Хамас. Алудирајќи на фактот дека 15 израелски војници беа убиени во текот на викендот, Нетанјаху рече дека војната има висока цена.
„Правиме се за да ги заштитиме животите на нашите воини“, рече тој.
„Да бидеме јасни, ова ќе биде долга војна“, најави израелскиот премиер.
Израелската армија во неделата ги негираше наводите за злосторство извршено во болница во Газа.
Пред една недела, Ал Џезира објави дека израелската армија ги уништила шаторите на бегалците во дворот на болницата, при што загинале околу 20 луѓе.
Според извештајот на Си-Ен-Ен, тие застрелале неколку лекари, иако веќе ја провериле нивната можна поврзаност со терористички активности и дозволиле воено куче да касне човек во инвалидска количка.