Балистичките ракети кои сирискиот режим ги користи против бунтовниците, убиваат голем број цивили, вклучително и деца, објави организацијата „Хјуман Рајтс Воч“ по истрагата за истрелување на девет ракети меѓу февруари и јули годинава.
Овие ракети убиле најмалку 215 лица, меѓу кои стотина деца, соопшти „Хјуман Рајтс Воч“, откако ги посетиле седум од деветте места, кои биле цел на ракетен напад.
– Политиката на воените команданти не би требало да предвидува користење на балистички ракети во реони со цивилно население, соопшти организацијата.
Честата употреба на такви ректи во населени места силно наведува на мислата дека армијата свесно користи воени техники, кои не прават разлика меѓу мирни и завојувани граѓани, а тоа е тешко кршење на меѓународното право, наведува „Хјуман Рајтс Воч“.
Повикувајќи се на извештај на Меѓународниот институт за стратешки истражувања, организацијата наведува дека сириската армија располага со ракети „Скад“, „СС-21“ и „Луна- М“.