Организацијата за заштита на човековите права „Хјуман рајтс воч“ ги повика сириските бунтовници да престанат да врбуваат деца за учество во воените дејствија и ги предупреди финансиерите дека можат да бидат судени за воени злосторства.
Во извештајот на „Хјуман рајтс воч“ – „Можеби ќе живеам можеби ќе умрам: Собирањето и користењето на деца од вооружените групи во Сирија“ се истакнува дека бунтовниците во борбите користат 15-годишни деца.
– Екстремистичките групи како Исламска држава во Ирак и Левантот врбуваат деца кои ги користат за опасни задачи, вклучително и самоубиствени мисии, се посочува во извештајот.
Покрај ИДИЛ, деца користат и Слободна сириска армија, Исламски фронт, Фронтот „Нусра“ и курдските сили, кои врбуваат и девојчиња. Во истражувањето не се опфатени провладините милиции.
Бројот на деца војници не е познат, но според невладините организациии во Сирија од септември 2011 годиниа загинале 194 деца, кои не биле цивили.