Новиот дигитален систем за влез/излез (EES) на Европската Унија се соочува со „технички тешкотии“, призна денеска претседателката Урсула фон дер Лајен.
„Интензивно работиме со земјите-членки за да ги отстраниме техничките проблеми“, рече фон дер Лајен на прес-конференција во Корк, Ирска.
EES е предмет на загриженост од неговото постепено воведување минатата година, но тешкотиите станаа поизразени во последните недели поради ненадејното зголемување на воздушниот сообраќај за време на врвот на летната туристичка сезона во Европа.
Аеродромите и авиокомпаниите го обвинуваат новиот систем за гранична контрола, кој бара патниците од земјите надвор од Европската Унија да регистрираат биометриски податоци, за долгочасовните чекања на граничните премини, оперативните прекини и пропуштените летови за поврзување.
„Сè уште имаме многу работа пред нас за да ги решиме овие технички тешкотии заедно со земјите-членки“, рече претседателката на Комисијата, пишува Политико.
Нејзините изјави претставуваат промена во тонот на Европската комисија, која досега го минимизираше обемот на проблемите поврзани со имплементацијата на EES.
Портпаролот на Комисијата за внатрешни работи, Маркус Ламерт, во среда изјави дека „влијанието на системот на повеќето европски аеродроми е ограничено“. Порано оваа година, комисијата изјави дека постапката за евидентирање на влезот или излезот на патниците трае просечно околу 70 секунди. Но, авијациската индустрија претставува значително поинаква слика.
Откако EES стана задолжителна, „времето на чекање на граничната контрола значително се зголеми, достигнувајќи до пет часа во периодите на шпиц во сообраќајот“, предупредија во отворено писмо упатено до Урсула фон дер Лајен, европската асоцијација на аеродроми ACI Europe и здруженијата на авиопревозници IATA и Airlines for Europe.
„Ваквите доцнења влијаат на милиони патници кои влегуваат во Шенген зоната. Во исто време, аеродромите и авиокомпаниите се соочуваат со зголемени оперативни прекини, вклучително и доцнења на летови, пропуштени поврзувачки врски и зголемен притисок врз персоналот на првата линија“, предупредуваат трите организации.
Тие побараа од Европската комисија да им дозволи на земјите-членки поголема флексибилност, вклучително и можност за целосно привремено прекинување на примената на ЕЕС кога е потребно, барем во текот на јули и август.