Словачкиот премиер Роберт Фицо вчера се појави во јавноста за прв пат откако беше тешко повреден во обид за атентат.
Тој одржа говор за време на вечерната прослава на Денот на Кирил и Методиј, национален празник во Словачка.
Во својот говор тој го пофали својот унгарски колега Виктор Орбан за неговите посети на Киев и Москва оваа недела.
„Сакам да изразам восхит кон унгарскиот премиер што не се двоумеше да ги посети Киев и Москва. Ако здравјето ми дозволи да патувам, со задоволство би му се придружил“, рече Фицо.
Орбан вчера беше во Москва, а три дена претходно во Киев.
Словачкиот премиер беше застрелан од 71-годишниот писател Јурај Цинтула со неколку куршуми на 15 мај по владиниот состанок во градот Хандлова. Фицо потоа беше опериран од неколку часа и во последните недели се опоравуваше дома.
Инаку, Орбан вчера пристигна во Москва на средба со рускиот претседател Владимир Путин. Потегот на Орбан наиде на укор од лидерите на Европската унија, кои јасно ставија до знаење дека унгарскиот премиер нема да го претставува Брисел за време на неговиот престој во Русија.
Орбан изјави дека Унгарија може да стане единствената земја во Европската унија која одржува врски и дијалог и со Русија и со Украина.
Претходно оваа недела тој го посети Киев, каде што се сретна со украинскиот претседател Володимир Зеленски.