Словачкиот премиер Роберт Фицо беше ранет во пукање по состанокот на владата.
За потсетување, Фицо победи на изборите во октомври 2023 година и со тоа го освои четвртиот мандат како премиер.
Инаку, во текот на својата тридецениска кариера, Фицо (59) вешто играше меѓу проевропските „мејнстрим“ и националистичките антибриселски и антиамерикански позиции, покажувајќи подготвеност да го промени курсот во зависност од јавното мислење или променетата политичка реалност.
Фицо зазеде уште поекстремни позиции во изминатите четири години, вклучително и напади врз западните сојузници, ветувања дека ќе ја прекине воената поддршка за Киев, ги критикуваше санкциите против Русија и се закани дека ќе стави вето на секоја идна покана на НАТО за Украина.
Фицо, за кого аналитичарите велат дека е инспириран од унгарскиот премиер Виктор Орбан, во своите говори изјави дека во срцето ги има интересите на Словачка и дека сака војната да заврши, поради што би ја прекинал помошта за Украина.
Фицо ја критикуваше и либералната претседателка на Словачка Зузана Чапутова, која го тужеше за ширење лаги за неа.
Роден во работничко семејство, Фицо дипломирал право во 1986 година и се приклучил на тогашната владејачка Комунистичка партија.
По падот на комунистичкото владеење во 1989 година, тој работеше како државен адвокат, освои место во парламентот под преименуваната Комунистичка партија и ја претставуваше Словачка во Европскиот суд за човекови права.
Фицо ја води партијата СМЕР-Социјалдемократија од 1999 година, откако ја основа за да се спротивстави на централнодесничарската реформска влада.