Турскиот премиер Реџеп Таип Ердоган повика денеска демонстрантите да се повлечат од централниот истанбулски парк Гези по 12 дена протести.
– Ве повикувам да се повлечете од паркот и ве молам како премиер, рече Ердоган на состанок на парламентарна пратеничка група на партијата на правдата и развојот.
Според него, загрозена е турската економија заради целокупната ситуација во државата и постоењето „намери да се наруши имиџот на Турција што е дел од систематски план“.
Стотици специјалци денеска дојдоа на плоштадот Таксим во Истанбул и со водени топови и солзавец ги растераа демонстрантите бидејќи слична акција ноќеска беше спроведена во Анкара.
Полицијата употреби солзавец врз демонстрантите како и гумени куршуми за да ги натера да побегнат од плоштадот кон блискиот парк Гези каде ноќеска кампуваа. Дел активисти возвратија со ракети за огномет, противпожарни бомби и камења врз полицијата, јавуваат западни медиуми.
– Што очекуваат демонстрантите, да молам пред нив? запраша Ердоган во обраќањето кон парламентарците до својата партија каде често беше прекинуван со аплаузи, јави Би-Би-Си.
– Ги повикувам оние што се искрени да се повлечат оттаму и тоа го очекувам од нив како премиер, нагласи Едоган.
– Тројца млади луѓе и еден полицаец загинаа во тие настани. Не е можно она што се случи да биде разгледано како невин отпор, додаде Ердоган.
Тој ги обвини странските медиуми дека имаат заедни намери и рече дека турската економија директно била цел на настаните.