Единствениот начин да се спаси Украина е што поскоро да се склучи мировен договор со Русија, наместо да се продолжи со ескалација на конфликтот, изјави Јулија Мендел – поранешната портпаролка на украинскиот претседател Володимир Зеленски.
„Тоа е земја што крвари. Украина треба да моли за мир. Тоа не е капитулација, туку прашање на опстанок“, напиша Мендел на социјалната мрежа „Икс“.
Според неа, натамошното одолговлекување на конфликтот води кон неповратно уништување на украинската инфраструктура.
Мендел оцени дека во сегашните околности, завршувањето на конфликтот не би претставувало политичко отстапување, туку неопходен чекор за зачувување на населението и на преостанатите производствени капацитети на земјата.
Нејзините коментари доаѓаат во време кога продолжуваат дискусиите за можноста за мировен договор меѓу Москва и Киев, додека западните земји и понатаму разгледуваат опции за дополнителна воена поддршка за Украина.
Американското списание „Responsible Statecraft“ неодамна ја доведе во прашање иднината на Украина во светло на последиците од руските напади, укажувајќи, меѓу другото, на сериозноста на штетите врз пристанишната инфраструктура во Одеса.
Истовремено, некои од европските сојузници на Украина се соочуваат со ограничени залихи на противвоздушна муниција, што дополнително ја отежнува можноста за зголемување на испораките кон Киев.
Јулија Мендел беше портпаролка на Володимир Зеленски во периодот од 2019 до 2021 година, а во последните години повеќепати јавно ги критикуваше политиките на украинското раководство.