Претседателката на Европската комисија Урсула фон дер Лајен и британскиот премиер Борис Џонсон денеска укажаа на „значителни разлики“ во врска со договорот за меѓусебните односи после Брегзит.
Тие телефонски разговараа со цел да се договорат за „агендата“ на преговорите кои ќе продолжат во понеделник во Лондон.
Во текот на претходните две недели немаше напредок во разговорите, со што се зголемува опасноста од Брегзит без договор.
Фон дер Лајен на Твитер напиша дека најголемите несогласувања се за прашањата за риболов и гаранциите во областа на конкуренцијата што ги бара ЕУ.
Портпаролот на Џонсон даде слична изјава.
Џонсон и фон дер Лајен „се согласија да останат во личен контакт“ и оти преговарачките тимови ќе го продолжат дијалогот следната недела.
Крајниот рок за договорот за економијата се сметаше за средината на ноември, за да може да биде усвоен и да стапи во сила пред 1 јануари 2021 година, кога европските регулативи ќе престанат да важат за Велика Британија.