Најмалку двајца украински војници и еден цивил се убиени во изминатото деноноќие во Источна Украина, каде судирите продолжуваат наспроти договорениот прекин на огнот, јавија денеска претставници на силите на Киев и проруските сепаратисти во регион.
– Како резултат на провокации и престрелки двајца украински војници се убиени, а шестмина повредени, изјави воениот портпарол Андриј Лисенко.
Интензивни воени активности имало вчера западно од Доњецк, вклучително околу аеродромот, како и околу Мариупол, вториот голем град во зоната на конфликт, контролиран од Киев.
Претставникот на сепаратистите Едуард Басурин изјави дека еден цивил е убиен во близина на аеродромот во Доњецк, кој е под контрола на бунтовниците од јануари.
Наспроти примирјето од 15 февруари, постигнато со договорот од Минск, на почетокот на јуни во Источна Украина повторно има повремени воени судири.