Австрискиот канцелар Кристијан Керн, на чија иницијатива денеска во Виена се одржува Самит за бегалската криза, изјави дека целта на овие разговори, во кои учествуваат високи претставници на ЕУ, е да се „забрзаат“ напорите за решавање на најлошата мигранстка криза во Европа од 1945 година.
Керн пред почетокот на Самитот во интервју за австрискиот весник „Клајне цајтунг“ истакна дека тоа вклучува „масовно подобрување“ на заштитата на надворешните граници на ЕУ, поголеми напори околу грижата за бегалците во регионот од кој тие доаѓаат и „Маршалов план“ за Африка.
– Моментно постојат повеќе индивидуални мерки, но не и заедничка европска линија, нагласи австрискиот канцелар.
Инаку „Маршаловиот план“, наречен План за европска обнова, бил американски план за обнова на повоена Европа по Втората светска војна, а задачата за изработка на планот ја добил Џорџ Маршал и неговите колеги од Стејт департментот.