Сирискиот претседател Ахмед ал-Шара ќе ја посети Москва во понеделник, и покрај одложувањето на арапскиот самит во руската престолнина на кој требаше да присуствува, објави сириската провладина телевизија.
Како што е најавено, Шаара ќе разговара за континуираното руско присуство во поморската база во Тартус и воздухопловната база во Хмејмим, потврди официјален сириски извор за Ројтерс.
Тој, исто така, официјално ќе побара од Москва да го екстрадира соборениот сириски претседател Башар ал-Асад, руски сојузник, за судење за наводни злосторства против Сиријците, додаде изворот.
Ал-Шара, кој некогаш беше на чело на сирискиот огранок на Ал Каеда, го предводеше нападот на бунтовничката група Хајат Тахрир ал-Шам врз Дамаск во декември минатата година, со кој беше соборен Асад и беше воспоставена нова влада.
Асад избега од Сирија пред падот на Дамаск и доби азил во Русија, каде што и денес е.