Руски брод натоварен со оужје плови кон Сирија и во текот на викендов би требало да пристигне во сириското пристаниште Тартус, објави телевизија Ал Арабија.
„Дознаваме дека руски брод натоварен со големо количество оружје планира да се истовари во сириското пристаниште Тартус“, тврди телевизијата.
Според Ал Арабија, бродот испловил од Русија на 6-ти мај и се движи „на сомнителен начин обидувајќи се да ја сокрие својата крајна дестинација“.
Информацијата за западни медиуми ја потврдиле и неименувани дипломати во седиштето на ОН во Њујорк, кои изјавиле дека веста на Ал Арабија е веродостојна.
Изворите во ОН тврдат дека станува збор за бродот „Професот Кацман“, кој плови под знамето на Малта, но е во сопственост на кипрска фирма, која пак е сопственост на руска компанија.
Руската компанија за извоз на оружје „Рособоронекспорт“, соопшти дека „нема информации за тој брод“, како и дека нејзина политика е „да не ги коментира индивидуалните товари, нивната содржина и времето на истовар“.