Репрезентацијата на Португалија избори пласман во осминафиналето на Светското првенство, откако во Торонто ја совлада Хрватска со 2-1 во натпревар од шеснаесетфиналето.
По неатрактивното прво полувреме следуваше спектакуларно второ, можеби и најдобро на досегашниот дел од Мундијалот. Хрватите во поголемиот дел од продолжението беа подобар противник, но немаа среќа да стигнат до место меѓу најдобрите 16 селекции.
Во осминафиналето Португалија ќе се соочи со Шпанија.
Овој натпревар воедно беше и последен во дресот на хрватската репрезентација за Лука Модриќ.
Португалците уште во четвртата минута имаа огромна шанса. Рафаел Леао проби по левата страна и врати до Бруно Фернандеш, кој шутираше, но Доминик Ливаковиќ одлично интервенираше.
Во првите десет минути Португалија беше далеку поопасен ривал, но без реализација. Истата слика продолжи и до крајот на првиот дел, кога Португалците изведоа и голем број корнери, но хрватската одбрана успешно се справуваше со сите опасности.
Бруно Фернандеш и Рафаел Леао се заканија уште неколкупати, но мрежите мируваа до паузата.
Хрватска многу подобро го отвори второто полувреме.
Во 48. минута Матео Ковачиќ се ослободи од својот чувар и шутираше со левата нога, но голманот Диого Кошта извонредно одбрани.
Само пет минути подоцна, Хрватите поведоа. Јосип Станишиќ продре по десната страна и испрати топка кон спротивната статива, каде што Иван Перишиќ ја смести во мрежата за 1-0.
Во 56. минута Никола Влашиќ повторно ја затресе мрежата на Португалија, но погодокот беше поништен поради офсајд.
Португалците веднаш возвратија. Во 58. минута Леао избори позиција за удар и испрати вистински проектил од околу 20 метри, но ја погоди гредата.
Само една минута подоцна Лука Сучиќ се обиде од другата страна, но Диого Кошта повторно беше сигурен. Во 61. минута Кристијано Роналдо ја прими една длабинска топка и ја испрати во мрежата, но и неговиот гол беше поништен поради офсајд.
Израмнувањето стигна во 68. минута.
По корнерот за Португалија, Влашиќ го влечеше Габриел Веига во шеснаесетникот. По интервенција од ВАР, судијата Еспен Ескас покажа на белата точка, а Кристијано Роналдо беше прецизен за 1-1.
До крајот на регуларниот дел Хрватска беше подобриот тим и создаде неколку одлични можности. Ковачиќ ја погоди стативата со удар од далечина, голема шанса имаше и Игор Матановиќ, додека голот на Лука Сучиќ повторно беше поништен поради офсајд. Во 88. минута огромна можност пропушти и Марио Пашалиќ, а казната стигна во судиското продолжение.
Во четвртата минута од дополнителното време Рафаел Леао центрираше од левата страна, а Гонсало Рамош беше највисок во скокот и со удар со глава погоди за 2-1.
Драмата не заврши тука.
Во 12. минута од судиското продолжение Матановиќ едвај ја допре длабинската топка, која стигна до Пашалиќ, а тој му асистираше на Јошко Гвардиол за израмнување на 2-2.
Сепак, ВАР повторно пресуди. Сензорот во топката покажа дека Матановиќ имал минимален контакт со неа, а Пашалиќ во тој момент бил во офсајд, па норвешкиот судија Еспен Ескас го поништи погодокот и ја потврди победата на Португалија со 2-1.