Во Радовиш и Струмица од утре до 11 септември ќе биде одржан шестиот Југоисточен Европски шампионат во спортска ориентација на кој ќе учествуваат околу 500 натпреварувачи од Македонија и од 12 европски држави.
Шампионатот стартува со спринт трката што ќе се одржи во Радовиш на 8 септември на Денот на независноста, а свеченото отворање ќе биде на градскиот плоштад „Гоце Делчев“ во Струмица.
На 9 септември натпреварувачите ќе тргнат на месноста „Суви лаки“ на планината Огражден каде ќе трчаат долга патека, а на 10 и 11 септември шампионатот се сели на локалитетот „Бел камен“ на планината Плачковица во Радовиш каде што учесниците на ова европско натпреварување ќе трчаат средна патека и штафетата.
На Шампионатот ќе учествуваат селекциите на Србија, Босна, Црна Гора, Хрватска, Словенија, Грција , Албанија, Бугарија, Молдавија, Романија, Турција и Северен Кипар.
Шампионатот ќе се одржи под мотото „Спортската ориентација не познава граници“ бидејќи, како што информираат организаторите, во овој спорт може да се вклучат сите и млади и стари и професионалци и рекреативци што го овозможува спојот на трчање и пронаоѓање контролни точки со помош на топографска карта и компас.