Дефанзивецот на Реал Мадрид, Едер Милитао, повторно се соочува со сериозни проблеми со повреди, што дополнително ја комплицира неговата веќе тешка сезона.
Бразилскиот стопер веќе пропушти 26 натпревари оваа сезона, продолжувајќи ја низата здравствени проблеми што го мачеа во последните години. Во претходните две сезони, тој двапати ги скина вкрстените лигаменти на коленото, поради што одигра само 31 натпревар во тој период.
Тековнава сезона не беше многу подобра – тој беше надвор од терените речиси четири месеци поради повреда на бутниот мускул.
Тој се врати на теренот дури кон крајот на март, но нова компликација се случи во вторник за време на победата на Реал Мадрид над Депортиво Алавес (2:1), кога повторно се повреди. На почетокот се чинеше дека ќе го пропушти само крајот на сезоната, но дека ќе биде подготвен за Светското првенство.
Сепак, понатамошните прегледи открија потешка слика.
„AS“ објавува дека станува збор за повреда на мускулот на левата нога, заедно со обновување на стара повреда поради која направи долга пауза. За целосно закрепнување ќе биде потребна операција.
Ова значи дека Милитао нема да биде достапен за Светското првенство, а неговото враќање на теренот не се очекува до почетокот на следната сезона.
Оваа вест е голем удар за селекторот на Бразил, Карло Анчелоти, кој многу добро го познава Милитао од времето во Реал Мадрид, каде што одигра 131 настап под негово водство.