Во тек е реконструкција на спортскиот терен и простор во училишниот двор на гимназијата „Миле Јаневски – Џингар“ во Македонска Каменица. Во рамки на проектот како што информираа од каменичката гимназија ќе биде поставена нова стандардизирана „FIBA“ опрема и подлога на теренот од кошаркарското игралиште како и додатна урбана опрема на просторот од училишниот двор.
За градоначалникот Соња Стаменкова, реализацијата на овој проект за младите од Македонска Каменица значи отворање на поголеми можности за спортски активности.
– Со изградбата на новото модерно кошаркарско игралиште и урбано уредениот простор се надевам дека ќе допринесеме училишниот двор во гимназијата „Миле Јаневски – Џингар“ да добие сосем нов лик, а воедно да прерасне како урбано катче на многу идни генерации и место во кое младите ќе продолжат да спортуваат во подобри услови како и да го користат за голем број на спортски активности и дружење, рече Стаменкова.
Изградбата на ново модерно кошаркарско игралиште се реализира на иницијатива на општина Македонска Каменица и рудник САСА.