По дебаклот на сите домашни фронтови, на Манчестер Јунајтед му останува само Лига Европа за борба за трофејот. Но, тренерот на „црвените ѓаволи“, Рубен Аморим не размислува за тоа во моментов.
В четврток „црвените ѓаволи“ ќе патуваат во Баскија на осминафиналето против Реал Сосиедад. Лига Европа не е само единствена шанса за трофеј, туку веројатно и единствена шанса за пласман во Лигата на шампионите.
Судејќи според она што го пренесува „Фудбал инсајдер“, Португалецот му се доверил на пријател дека жали за преземањето на Манчестер Јунајтед и како играчите мислат дека се многу подобри отколку што навистина се.
Јасно е дека Аморим има поголема грижа од подготовката за натпреварот против Реал Сосиедад, што и самиот го призна на прес-конференцијата.
„Луѓето на Лига Европа гледаат како на натпреварување кое можеме да го освоиме, но и како на полигон за пласман во Лигата на шампионите. Но, да бидам искрен, мислам дека имаме поголеми грижи. Знам дека е чудно тоа што го кажувам, но мора да се обидеме да изградиме нешто овде и тоа мора да биде поважно во овој момент отколку да победиме во натпревар“, изјави Аморим.