Челните луѓе во ATP одлучија да воведат нови правила во тенисот. Првото се однесува на скратување на времето за подготовка на сервис.
Познато е дека најмногу секунди пред сервирање трошат Надал и Ѓоковиќ и токму овие двајца тенисери би можеле да ги почувствуваат последиците, затоа што ако се надмине предвиденото време од 25 секунди, најпрво тенисерот ќе биде опоменат, а потоа ќе му биде доделена сервис грешка.
„Многу разговаравме за времето кое поминува помеѓу два поена. Веруваме дека оваа промена ќе овозможи судиите доследно да го применуваат правилото“, изјави извршниот директор на ATP, Бред Друи.
Втората промена се однесува на укинување на „нец“ односно ако топчето ја закачи мрежата при сервирањето, играта продолжува и тоа правило ќе биде тестирано во првите три месеци од 2013-та година.